Cynorthwywyr Ymchwil

Mae ceisiadau bellach ar agor ar gyfer swyddi Cynorthwyydd Ymchwil i ddechrau ym mis Medi 2025

Y dyddiad cau ar gyfer ceisiadau yw 11.55yh ar Ddydd Mawrth 4 Chwefror 2025.

Ymgeisiwch trwy’r dolenni canlynol:

Meini prawf cymhwyso: o leiaf dwy flynedd o astudiaethau cyfreithiol cymeradwy hyd safon 2:1 uchel/dosbarth cyntaf, neu brofiad cyfatebol.

Cyn i chi wneud cais, mae’n rhaid i chi ddarllen y Canllaw i Ymgeiswyr – sut i wneud cais.

Mae rhagor o wybodaeth ar gael yn y Canllaw i Ymgeiswyr – cyffredinol.

O ganlyniad i drosolwg gweinyddol, mae’n ddrwg gennym nodi bod cyhoeddiad y fersiynau Cymraeg o’r canllawiau hyn wedi’i ohirio. Rydym yn rhagweld y bydd y fersiynau wedi’u cyfieithu ar gael ar y wefan erbyn 24 Ionawr 2025. Rydym wedi ymestyn y dyddiad cau ar gyfer ceisiadau i 4 Chwefror 2025 (11:55yh) er mwyn ystyried yr oediad hwn.

Mae’n ddrwg gennym am hyn ac ymddiheurwn. Rydym yn deall o’n gwaith yng Nghymru (er enghraifft ein prosiect ar gyfraith amaethyddol) pa mor bwysig yw hi i allu cyfathrebu gwybodaeth allweddol yn Gymraeg ac nid yn Saesneg yn unig. Mae Comisiwn y Gyfraith yn cynrychioli Cymru a Lloegr, felly rydym yn awyddus i annog ceisiadau gan siaradwyr Cymraeg i’n helpu i gynnal a datblygu ein gwaith yng Nghymru, a gofynnwn i ymgeiswyr nodi lefel eu hyfedredd mewn Cymraeg ysgrifenedig a llafar yn eu ceisiadau.

Ymddiheurwn am y trosolwg yma a gobeithiwn ei gywiro cyn gynted â phosibl.

Ymunwch â Chomisiwn y Gyfraith fel cynorthwyydd ymchwil

Bob blwyddyn, mae Comisiwn y Gyfraith yn recriwtio unigolion eithriadol ar gyfer rolau cynorthwyydd ymchwil â thâl am gyfnod penodol, gan gynnig cyfle unigryw i lywio dyfodol y gyfraith a’i heffaith ar gymdeithas. Ar gyfer ein hymgyrch recriwtio yn 2025, bydd ceisiadau’n agor ddechrau mis Ionawr ac yn cau ddiwedd mis Ionawr. Bydd diweddariadau’n cael eu rhannu yma ac ar ein sianeli cyfryngau cymdeithasol. Isod ceir trosolwg o’r rôl, y meini prawf ar gyfer gwneud cais, a pham mai dyma un o’r cyfleoedd y mae’r galw mwyaf amdanynt yn y sector cyfreithiol.

Gwybodaeth am y rôl

Mae cynorthwywyr ymchwil yn ymuno â ni ar naill ai:

  • Contract cyfnod penodol am ddwy flynedd (103 wythnos), neu
  • Contract cyfnod penodol am flwyddyn (52 wythnos) fel dewis arall.

Mae ein swyddfa, sydd wedi’i lleoli yng nghanol Llundain, yn eich rhoi wrth galon Whitehall, gan roi cipolwg i chi ar sut mae’r llywodraeth a llunio polisïau yn gweithio.

Pam gwneud cais?

Mae ymuno â Chomisiwn y Gyfraith yn golygu dod yn rhan o sefydliad sy’n sbarduno diwygio cyfreithiol gwirioneddol a pharhaol. Yn y Comisiwn, byddwch yn gwneud y canlynol:

  • Cael dylanwad ystyrlon – Mae dros ddwy ran o dair o’n hargymhellion yn cael eu gweithredu neu eu derbyn gan y llywodraeth, gan sicrhau bod eich gwaith yn cyfrannu at newidiadau pwysig a phendant yn y gyfraith.
  • Datblygu arbenigedd amhrisiadwy – Meithrin sgiliau mewn ymchwil gyfreithiol, dadansoddi polisi, drafftio deddfwriaethol a rheoli ymgynghoriadau, gan fynd i’r afael â heriau sy’n ysgogi’r meddwl.
  • Cydweithio ag arbenigwyr blaenllaw – Gweithio’n agos â barnwr Llys Apêl, Cwnsleriaid y Brenin, bargyfreithwyr, cyfreithwyr ac academyddion sydd ar flaen y gad yn eu meysydd.
  • Rhoi hwb i’ch rhagolygon gyrfa – Mae profiad yng Nghomisiwn y Gyfraith yn uchel ei barch, gyda llawer o gynorthwywyr ymchwil yn symud ymlaen i yrfaoedd nodedig yn y Bar, mewn cwmnïau cyfreithiol blaenllaw, y byd academaidd neu bolisi.
  • Gweithio ar ddiwygiadau o bwys – Bydd eich cyfraniadau’n siapio’r gyfraith mewn ffyrdd sy’n effeithio ar fywydau beunyddiol pobl – mae hyn yn waith sydd â phwrpas.

Beth mae cynorthwywyr ymchwil yn ei wneud?

Mae rôl cynorthwyydd ymchwil yn gymysgedd o ymchwil gyfreithiol, dadansoddi polisi a gwaith gweinyddol.

Mae cynorthwywyr ymchwil yn cael eu neilltuo i un o bedwar tîm arbenigol:

  • Cyfraith Masnach a’r Gyfraith Gyffredin
  • Cyfraith Trosedd
  • Cyfraith Eiddo, Teulu ac Ymddiriedolaeth
  • Cyfraith Gyhoeddus

O fewn y timau hynny, mae’r mwyafrif o gynorthwywyr ymchwil yn gweithio’n bennaf ar un prosiect sy’n cefnogi cyfreithiwr – cyfreithiwr, bargyfreithiwr neu academydd fel arfer. O dan eu harweiniad, ac yn dibynnu ar ba gam y mae’r prosiect, gallwch wneud y canlynol:

  • Cynnal gwaith ymchwil a dadansoddi cyfreithiol manwl.
  • Drafftio adroddiadau, papurau ymgynghori a deunyddiau allweddol eraill.
  • Cwrdd a chyfathrebu ag amrywiaeth eang o randdeiliaid.
  • Helpu i drefnu a rheoli ymgynghoriadau cyhoeddus ar raddfa fawr.
  • Helpu i ddatblygu argymhellion ar gyfer diwygio a chyfarwyddo Cwnsleriaid Seneddol ar ddeddfwriaeth ddrafft.

Am bwy rydyn ni’n chwilio?

Rydym yn croesawu ceisiadau gan ymgeiswyr sy’n frwd dros ddiwygio’r gyfraith, p’un a ydych wedi graddio’n ddiweddar, wedi dilyn astudiaethau cyfreithiol pellach, neu wedi cael profiad proffesiynol.

O ystyried natur gystadleuol y rôl, rydym yn chwilio am ymgeiswyr sy’n bodloni’r meini prawf canlynol:

  • Rhaid i chi fod wedi cwblhau cwrs neu gyrsiau oedd yn cynnwys dwy flynedd o astudiaethau cyfreithiol cymeradwy amser llawn (neu astudiaethau rhan-amser cyfatebol).
  • Rhaid i chi feddu ar radd dosbarth cyntaf neu 2:1 uchel yn y gyfraith.

Os nad yw eich gradd yn bodloni’r safon hon, gallech fod yn gymwys o hyd os gallwch ddangos rhagoriaeth academaidd drwy un o’r cymwysterau canlynol:

  • Diploma Graddedig yn y Gyfraith (neu Arholiad Proffesiynol Cyffredin) ar lefel rhagoriaeth, neu ar lefel canmoliaeth gydag o leiaf un rhagoriaeth a thystiolaeth ychwanegol sylweddol o sgiliau a gwybodaeth.
  • Bod wedi cwblhau gradd meistr yn y gyfraith (LLM, BCL, MA, neu M Phil) ar lefel teilyngdod (2:1) neu uwch.
  • Bod wedi cwblhau PhD yn y gyfraith.

I gael rhagor o fanylion am y rôl, y broses ymgeisio a’r meini prawf hanfodol, edrychwch ar y canllaw ymgeisio.

Fideos Defnyddiol Isod: